Marie Losier (Frantzia, 1976) zinegilea eta komisarioa da. 20 urtez New York hirian lan egin du, eta museoetan, galerietan, bienaletan eta festibaletan erakutsi izan ditu bere pelikulak eta bideoak. Abangoardiako zuzendarien, musikarien eta konpositoreen erretratu zinematografiko ugari egin ditu, besteren artean hauenak: Kuchar anaiak, Guy Maddin, Richard Foreman, Tony Conrad, Genesis P-Orridge, Alan Vega, Peter Hristoff eta Felix Kubin. Artista horien bizitza eta lana arakatzen dituzten filmak dira, kapritxosoak, poetikoak, onirikoak eta konbentzioetatik urrun. Losierren aurreneko film luzea Genesis Breyer P-Orridge musikari eta artista aitzindariaren eta haren bikotekide Lady Jayeren erretratu bat zen. La Balada del Génesis y Lady Jaye Berlineko Zinemaldian estreinatu zen 2011ko otsailean, eta hainbat sari irabazi eta zinemaldi ugaritan proiektatu zen. Losierrek bere karreraren atzera begirako bat izan du MoMA NYen duela gutxi eta 2018ko azaroan bere film guztiak eskuratu ziren museoko artxiboetarako. Felix Kubin (Felix Kubin, Atomium Vertigo) konpositore eta musikari alemanari buruzko bere film luzea amaitu eta gero, ikus-entzunezkoen, arte plastikoen eta argazkilaritzaren eremuko erakusketak eta lanak egiten jarraitzen du.